Me aktivitete të ndryshme përkujtimore, sot dhe nesër shënohet 27-vjetori i Masakrës së Reçakut në Kosovë. Në kuadër të manifestimit 'Ditët e Reçakut', institucionet vendore dhe qendrore, bashkë me shoqatat e dala nga lufta, zhvillojnë ngjarje për nderim të viktimave dhe ruajtje të së vërtetës historike.
Aktivitetet mbahen nën patronatin e Presidentes Vjosa Osmani, Kryetarit të Kuvendit, Dimal Basha, Kryeministrit në detyrë Albin Kurti, Kryetarit të Komunës së Shtimes, Qemajl Aliu dhe shoqatave të dala nga lufta.
Aktivitetet e sotme (14 janar)
• Në të gjitha shkollat e Komunës së Shtimes mbahet ora e parë mësimore kushtuar 15 janarit – Masakrës së Reçakut.
• Në orën 10:00, në Bibliotekën e Qytetit, Forumi i Intelektualëve të Shtimes organizon tryezë shkencore me temën “Mohimet serbe të krimeve dhe gjenocidit – destabilizim për Ballkanin”.
Aktivitetet e nesërme (15 janar)
• Në të gjitha shkollat e Republikës së Kosovës mbahet ora e parë mësimore kushtuar 15 janarit – Masakrës së Reçakut.
• Në orën 09:00, homazhe nga niveli komunal në Varrezat e Dëshmorëve në Shtime, Mollopolc dhe Reçak.
• Në orën 10:30, homazhe nga krerët e shtetit në Kompleksin Memorial në Reçak.
• Në orën 12:00, akademi përkujtimore në Shtëpinë e Kulturës në Shtime.
• Në orën 13:00, hapet ekspozita “Çmimi William Walker 2026”, edicioni i dytë, ideatore Emine Jetishi, në Shtëpinë e Kulturës në Shtime.
• Në orën 15:00, finalja e turneut memorial në futboll të vogël “Ditët e Reçakut” në fushën sportive “Arbëri” në Reçak.
Përditësime
Komuna e Shtimes konfirmoi se më 14 janar, në të gjitha shkollat e saj u mbajt ora e parë mësimore kushtuar Masakrës së Reçakut.
Kjo masakër e 15 janarit 1999 përfshiu vrasjen e 45 civilëve shqiptarë nga forcat serbe. Deklarata e kreut të OSBE-së në Kosovë, William Walker, e cilësoi si masakër, duke çuar në Konferencën e Rambujesë dhe ndërhyrjen e NATO-s.