Në ambientet e Kinemasë Millennium u shfaq premiera e dokumentarit kushtuar ikonës së teatrit dhe kinematografisë shqiptare, Robert Ndrenika. Filmi, i prodhuar nga Mediavizion me skenar dhe regji nga Iva Garo dhe Namik Ajazi, sjell një rrëfim në vetën e parë të artistit, i cili ndan me publikun kujtime dhe reflektime nga karriera e tij shumëvjeçare.
Dokumentari ndërthur dëshmi të miqve, kolegëve dhe bashkëpunëtorëve, duke nxjerrë në pah si madhështinë artistike, ashtu edhe anën njerëzore të aktorit. Gjatë kësaj mbrëmjeje, në shenjë respekti për kontributin e tij të jashtëzakonshëm ndër dekada, Asambleja e Shoqatës Tirana i akordoi Robert Ndrenikës titullin “Mirënjohja e Qytetit të Tiranës”.
Robert Ndrenika, i cili mban titullin e lartë “Nderi i Kombit”, u vlerësua nga të pranishmit si një figurë thelbësore e kulturës shqiptare, e cila ka përcjellë emocione te publiku për më shumë se gjysmë shekulli.