Prefektura e Qarkut Shkodër ka dhënë njoftim zyrtar për situatën në territorin e saj dhe njësitë përreth, si pasojë e reshjeve të shiut dhe prurjeve të shtuara në kaskadën e lumit Drin gjatë 24 orëve të fundit.
Korporata Elektroenergjike Shqiptare (KESH) ka njoftuar se, pas monitorimit dhe vlerësimit për administrimin e prurjeve, ka nisur shkarkimet e kontrolluara nga hidrocentralet Fierzë, Koman dhe Vau i Dejës. Që nga orët e pasdites së djeshme, janë konstatuar rritje të niveleve të lumenjve Drin dhe Bunë, si dhe të Liqenit të Shkodrës.
Situata në Obot
Në zonën e Obotit është evidentuar prezencë uji kryesisht në tokat bujqësore, duke zgjeruar sipërfaqen e përmbytur, por pa rrezik për banesat deri tani. Aksi rrugor lidhës i fshatit me rrugën kryesore ka ujë rreth 40-50 cm, duke vështirësuar kalimin për mjetet e vogla. Në terren ndodhen 2 mjete të kalueshmërisë së lartë dhe 10 efektivë të Forcave të Armatosura, në gatishmëri për nevoja emergjente.
Akset rrugore malore
- Aksi Bogë-Theth vijon të ndikohet nga reshje intensive bore; Qafa e Thorës mbetet e bllokuar në zonën e tuneleve për shkak të orteqeve. Punohen mjete borëpastruese për hapjen e rrugës.
- Në aksin Hani i Hotit-Vermosh ka reshje të dendura dëbore mbi kuotën 1000 m; qarkullimi kryhet vetëm me goma dimërore dhe asistencë të mjeteve borëpastruese.
Nga bashkitë Malësi e Madhe, Vau i Dejës, Pukë dhe Fushë-Arrëz nuk raportohen problematika. Strukturat e mbrojtjes civile dhe institucionet vendore vijojnë monitorimin në terren dhe mbeten në gatishmëri për çdo zhvillim.