Shoqata e të Drejtave të Pacientëve në Kosovë (PRAK) ka reaguar në lidhje me rastin në Gjilan, ku Arianit Sllamniku, i cili nuk është mjek, dyshohet se ka pretenduar shërimin e autizmit te fëmijët duke përdorur substanca të destinuara për kafshë si terapi.
Shoqata shpreh shqetësim të thellë dhe e cilëson rastin si fenomen alarmant që nxjerr në pah dështime serioze sistemike në mbrojtjen e pacientëve, veçanërisht të fëmijëve dhe familjeve në situata të ndjeshme emocionale dhe sociale. PRAK thekson se autizmi nuk është sëmundje që shërohet, por çrregullim i spektrit që kërkon ndërhyrje multidisiplinare, mbështetje afatgjatë dhe respekt për dinjitetin e fëmijës dhe familjes.
Reagimi identifikon tre probleme kryesore:
• Mungesën e shërbimeve të mjaftueshme, të qasshme dhe të integruara për fëmijët me çrregullime të zhvillimit, duke lënë familjet të dëshpëruara dhe pre e pretendimeve të rreme.
• Mungesën e kontrollit efektiv institucional dhe mbikëqyrjes së praktikave pseudomjekësore në hapësira informale dhe online, ku individë pa licencë promovojnë trajtime të rrezikshme pa ndëshkim të menjëhershëm.
• Nivelin e ulët të edukimit shëndetësor dhe informimit publik mbi çrregullimet e spektrit të autizmit, që krijon terren për dezinformim.
PRAK mirëpret reagimin e Ministrisë së Shëndetësisë dhe konfirmimin e Policisë së Kosovës se rasti trajtohet në koordinim me Prokurorinë e Shtetit, por vlerëson se këto hapa nuk janë të mjaftueshëm nëse mbeten të izoluar.