Mesditën e së mërkurës, në fshatin Grabovë të bashkisë Përmet, ka ndodhur një shpërthim i një lënde plasëse, duke lënë të plagosur dy shtetas. Sipas informacioneve paraprake, dyshohet se ngjarja ka ndodhur aksidentalisht, pasi personat kanë rënë në kontakt me mjetin shpërthyes.
Si pasojë e shpërthimit, Ervis Bregu, 38 vjeç, ka pësuar dëmtime të rënda fizike dhe është gjymtuar. Ai u dërgua fillimisht për ndihmë mjekësore në Spitalin e Gjirokastrës, por për shkak të gjendjes kritike, është bërë transportimi i tij me helikopter drejt Spitalit të Traumës në Tiranë. Shtetasi tjetër i përfshirë në ngjarje ka pësuar lëndime në pjesën e poshtme të dorës.
Forcat e policisë dhe grupi hetimor ndodhen në vendngjarje për kryerjen e veprimeve procedurale. Deri më tani, nuk janë bërë të ditura rrethanat e plota të ngjarjes dhe as lloji i saktë i lëndës plasëse që shkaktoi shpërthimin. Hetimet vazhdojnë për zbardhjen e shkaqeve të rastit.