Një shpërthim me lëndë plasëse ka ndodhur rreth orës 03:00 të mëngjesit të 10 majit 2026, në qytetin e Laçit, Kurbin. Lënda plasëse ishte vendosur në qepenin e derës së një dyqani, i cili ndodhet në një kompleks shërbimesh.
Nga ngjarja nuk raportohen persona të lënduar. Shpërthimi ka shkaktuar vetëm dëme materiale në ambientin e biznesit.
Menjëherë pas marrjes së njoftimit, në vendngjarje kanë mbërritur shërbimet e Policisë dhe grupi hetimor. Nën drejtimin e Prokurorisë, po kryhen veprimet hetimore për sqarimin e plotë të rrethanave, dokumentimin ligjor të rastit dhe identifikimin e autorit ose autorëve.
Sipas informacioneve paraprake nga autoritetet, po punohet për zbardhjen e motiveve të mundshme dhe kapjen e përgjegjësve. Hetimet vazhdojnë.