Vijon operacioni për gjetjen e trupit të shtetasit I. K., 42-vjeç, i cili dyshohet se është hedhur në Kanionet e lumit Osum. Kërkimet zhvillohen përgjatë rrjedhës së lumit në zonën e Skraparit dhe Beratit.
Gjatë këtij operacioni, më 21 shkurt 2026 rreth orës 17:00, shtetasi Xh. K., 22-vjeç, i angazhuar vullnetarisht në ndihmë të autoriteteve, mbeti i bllokuar pasi gomonia me të cilën lëvizte u përmbys në një zonë të kanioneve.
Menjëherë u nis operacioni i shpëtimit, i koordinuar nga Drejtoria Vendore e Policisë Berat. Në bashkëpunim morën pjesë forcat e RENEA, alpinistët e Federatës së Kërkim-Shpëtimit Malor të Shqipërisë, Forcat e Ushtrisë, shërbimi i urgjencës së Spitalit të Skraparit si dhe komuniteti i Çorovodës.
Pas ndërhyrjeje disaorëshe në terren të vështirë, rreth orës 04:45 të mëngjesit të 22 shkurtit 2026, vullnetari u nxorr nga shkëmbi ku ishte izoluar. Ai ndodhet në gjendje të mirë shëndetësore.
Kërkimet për gjetjen e 42-vjeçarit vazhdojnë me forcë të plotë përgjatë lumit Osum.