Prej pasdites së së hënës, ekipet e shpëtimit janë angazhuar në kërkimet për gjetjen e trupit të Armando Zajsi, 37-vjeçarit nga Laçi, i cili humbi jetën në Liqenin e Ulzës. Sipas dëshmive, ai u rrëzua nga një mjet lundrues tip Jet Ski dhe, pavarësisht përpjekjeve për të notuar drejt mjetit, u zhduk në thellësi.
Në operacionin e kërkimit janë përfshirë struktura të shumta, si RENEA, Forcat Speciale Detare, Forcat e Armatosura, Policia e Shtetit, Mbrojtja Civile dhe shërbimi i zjarrfikësve. Kërkimet po kryhen përmes zhytjeve të palombarëve, dronëve në sipërfaqe dhe mjeteve lundruese. Pritet që në operacion të vihet në përdorim edhe një dron nënujor i ardhur nga Forcat Detare të Vlorës.
Ekspertët bëjnë me dije se operacioni është i ndërlikuar për shkak të terrenit, pasi vendi ku dyshohet se ndodhet trupi është afër digës së hidrocentralit dhe ka një thellësi prej rreth 40 metrash. Përpjekjet për lokalizimin e viktimës vijojnë, ndërsa familjarët janë duke ndjekur nga afër procesin.