Një ngjarje tragjike është raportuar në liqenin e Ulzës, ku një shtetas 37-vjeçar, banues në Laç, ka ndërruar jetë pas një incidenti gjatë lundrimit. Sipas njoftimit zyrtar të Policisë së Matit, ngjarja është regjistruar rreth orës 18:20.
Sipas informacioneve paraprake, shtetasi me inicialet A. Z., duke drejtuar një mjet lundrues në liqen, dyshohet se ka humbur kontrollin dhe ka rënë në ujë. Më pas, në tentativë për t'u kapur sërish pas mjetit, dyshohet se është mbytur. Disa raportime sugjerojnë se mjeti në fjalë ka qenë një motor uji, i cili është përmbysur gjatë lëvizjes.
Pas marrjes së njoftimit, shërbimet e Komisariatit të Policisë Mat kanë mbërritur në vendngjarje. Gjithashtu, janë njoftuar polumbarët e forcave speciale RENEA, të cilët janë angazhuar në operacionin për gjetjen e trupit të viktimës. Grupi hetimor po vijon punën për sqarimin e plotë të dinamikës dhe shkaqeve që çuan në këtë ngjarje.
Përditësime
Burimet e Tv Klan bëjnë me dije se ngjarja tragjike ku humbi jetën 37-vjeçari në Liqenin e Ulzës ka ndodhur ditën e hënë, duke korrigjuar raportimet e mëparshme që e vendosnin këtë ngjarje të dielën.