Operacioni i kërkim-shpëtimit për gjetjen e trupit të një 37-vjeçari vijon në ujërat e Liqenit të Ulzës. Ngjarja dyshohet se ka ndodhur gjatë ditës së djeshme, kur i riu nga Laçi po lëvizte me një mjet lundrues të tipit motor uji (skaf).
Sipas informacioneve paraprake, shtetasi ka rënë në ujë gjatë manovrimit të mjetit dhe ka humbur jetën. Që nga momenti i njoftimit, në zonë janë angazhuar forcat e Policisë së Shtetit dhe polumbarë profesionistë. Përpjekjeve për gjetjen e tij u janë bashkuar edhe banorë të zonës dhe familjarë të 37-vjeçarit.
Deri në këto momente, kërkimet në thellësi dhe përgjatë vijës bregdetare të liqenit nuk kanë rezultuar të suksesshme. Autoritetet konfirmojnë se operacioni do të vazhdojë gjatë orëve në vijim, ndërsa po punohet për zbardhjen e plotë të rrethanave të ngjarjes.
Përditësime
Policia e Shtetit ka identifikuar viktimën si A. Z., 37 vjeç, i cili u mbyt në Liqenin e Ulzës. Sipas të dhënave paraprake, ngjarja u raportua në sallën operative rreth orës 18:20, pasi 37-vjeçari humbi kontrollin e mjetit dhe u mbyt gjatë përpjekjes për ta ndaluar atë. Në operacionin e kërkim-shpëtimit për nxjerrjen e trupit janë angazhuar polumbarët e forcave speciale RENEA.
Autoritetet kanë konfirmuar se viktima është Armando Zajsi, 37 vjeç. Operacioni i kërkimit në Liqenin e Ulzës ka hyrë në ditën e dytë, me angazhimin e 120 efektivëve dhe vullnetarëve. Në aksion janë përfshirë Forcat e Armatosura, Forca Detare, Mbrojtja Civile dhe Shërbimi Zjarrfikës, të cilët po përdorin dronë për të skanuar thellësitë e liqenit.