Prej 26 ditësh kërkohet trupi i 30-vjeçarit Jurgen Karaj nga fshati Fullqet i Klosit, i cili dyshohet se u rrëmbye nga rrjedha e ujit të zallit të Darsit më 10 janar në rrjedhën e lumit Mat.
Kërkimet janë zhvilluar pa ndërprerje në vijën lumore të Matit, me pjesëmarrjen e dhjetëra forcave të Batalionit të Tretë të Repartit të Këmbësorisë Burrel, familjarëve të Jurgenit dhe strukturave të tjera. E gjithë zona është kontrolluar disa herë, por pa gjetur trupin apo ndonjë shenjë të tij.
Që nga 29 janari, kërkimeve u është bashkuar një grup i specializuar nga Forcat e Sigurisë së Kosovës (FSK), me mbi 11 persona çdo ditë bashkë me forcat vendase. Tani po kontrollohet edhe bazeni ujor i liqenit të Ulzës.
FSK ka lëshuar dronin nënujor në hyrje të liqenit për të shqyrtuar thellësitë. Deri më 3 shkurt, nuk është gjetur asnjë gjurmë e Jurgen Karajt.
Kërkimet do të vazhdojnë, ndërkohë që prurjet e lumit Mat kanë rënë ndjeshëm, duke lehtësuar kontrollin në terren.