Komisioni Evropian po shqyrton një qasje të re për procesin e integrimit të vendeve kandidate, duke synuar një lidhje më të ngushtë të tyre me strukturat e Bashkimit Evropian. Sipas një dokumenti të zbardhur nga media belge "Rapporteur", Shqipëria dhe Mali i Zi mund të kenë të drejtën të dërgojnë komisionerët e tyre në Bruksel përpara se të bëhen anëtarë të plotë të BE-së.
Kjo skemë do t'u jepte vendeve kandidate një rol më të drejtpërdrejtë në hartimin e legjislacionit dhe politikave evropiane. Sipas dokumentit, komisionerët do të merrnin pjesë në punën e Kolegjit të Komisionerëve për çështje përkatëse, duke ruajtur njëkohësisht autonominë, kolegjialitetin dhe përgjegjësinë kolektive të organit drejtues. Një zhvillim i tillë do të ishte i paprecedentë, pasi e drejta e përfaqësimit në këtë nivel ka qenë e rezervuar deri më tani vetëm për zyrtarët e shteteve anëtare.
Krahas kësaj mase, Komisioni Evropian synon të thellojë integrimin e vendeve kandidate në tregun e vetëm, ndërkohë që ato vazhdojnë zbatimin e reformave të brendshme të kërkuara për anëtarësim. Plani i detajuar për këtë strategji të re zgjerimi do të prezantohet zyrtarisht të martën në Bruksel nga komisionerja për Zgjerimin, Marta Kos.