Në tremujorin e parë të vitit 2026, Drejtoria e Përgjithshme e Shërbimeve të Transportit Rrugor (DPSHTRR) regjistroi 17.7 mijë autovetura për herë të parë në Shqipëri. Nga këto, 59% përdorin naftë si lëndë djegëse, duke zënë peshën më të madhe të regjistrimeve të reja.
Krahasuar me vitin 2024, kur kjo përqindje ishte 66%, ka pasur një rënie me 6 pikë përqindje. Megjithatë, dominimi i makinave me naftë mbetet i lartë. Autoveturat me benzinë zinin 18% të totalit, ndërsa makinat elektrike arritën 13%, në nivel të ngjashëm me mesataren europiane të vitit 2024.
Krahasimi me Europën
Sipas të dhënave të Eurostat, përqindja e regjistrimeve të reja me naftë në Shqipëri është më e larta në Europë. Në Bashkimin Europian, në vitin 2024, mesatarisht 15% e regjistrimeve të reja ishin makina me naftë. Pas Shqipërisë renditen Moldavia me 47% dhe Bosnjë-Hercegovina me 44%. Në Europë mbizotëron benzina me rreth 60% të regjistrimeve të reja në të njëjtin vit.
Trendet në Bashkimin Europian
Nga viti 2014 deri në 2024, në 20 vende të BE-së, që përbëjnë 93% të makinave të reja të pasagjerëve, numri i automjeteve me naftë, përfshirë hibridet, ra me 67%. Në të njëjtën periudhë, automjetet me benzinë, përfshirë hibridet, u rritën me 60%.
Rënia lidhet me faktorë rregullatorë dhe tregu. Një pikë kthese ishte skandali Dieselgate në vitin 2015, kur Volkswagen manipuloi testet e emisioneve për miliona automjete diesel, duke goditur besimin e konsumatorëve. Më pas, vendet europiane shtrënguan standardet e ndotjes.