Shqipëria ka normën më të lartë të martesave në Europë. Sipas të dhënave të Eurostat për vitin 2024, u regjistruan 6.8 martesa për 1000 banorë, e barabartë me atë të vitit 2022 dhe shumë më e lartë se mesatarja e Bashkimit Europian prej 3.9.
Në vend të dytë renditet Maqedonia e Veriut, me të dhëna të fundit nga viti 2021. Për Kosovën mungojnë të dhënat zyrtare, ndonëse ajo ka popullsi të re dhe nivel të lartë martesash tradicionalisht. Në rajon, norma më e ulët është në Serbi, me 4.6 martesa për 1000 banorë. Pas Shqipërisë, norma të larta kanë Turqia me 6.6 dhe Moldavia me 6.1.
Evoluimi i martesave në Shqipëri
Në Shqipëri, niveli i martesave ka qenë i lartë në dekadat 1980-1990, me kulm në vitin 1990 prej 8.9 për 1000 banorë. Pas kësaj periudhe, u vu re rënie graduale. Në vitin 2024, numri i martesave arriti minimumin historik me 16 120, krahasuar me rreth 29 000 në vitet 1990.
Rritja e divorcave
Paralelisht, divorcet janë rritur. Në vitin 2024, norma ishte 2.0 për 1000 banorë, nga 0.6 në vitin 1964, një rritje prej rreth 233%. Kulmi u shënua në vitin 2019 me 2.1. Kjo normë kalon mesataren europiane prej 1.6.
Shqipëria renditet e 11-ta në Europë për norma divorcash. Duke përjashtuar vendet baltike si Lituania (2.5), Estonia (2.1) dhe Moldavinë (4), ajo është e pesta, pas Danimarkës (2.1), Turqisë (2.2), Finlandës (2.1) dhe Suedisë (2.1). Vendet baltike kanë norma të larta për shkak të pranueshmërisë shoqërore, lehtësisë ligjore dhe pavarësisë ekonomike të grave.
Të dhënat e INSTAT konfirmojnë rënien e martesave dhe rritjen e divorcave në Shqipëri.