Banka Botërore publikoi raportin e rregullt ekonomik rajonal për gjashtë vendet e Ballkanit Perëndimor. Raporti thekson se flukset e emigracionit vazhdojnë të pengojnë rritjen ekonomike afatgjatë dhe të krijojnë vështirësi në tregun e punës gjatë viteve 2024-2025.
Shqipëria mban vendin e parë me nivelin më të lartë të emigracionit neto. Shifra mbetet konstante në -24.2 mijë persona për të dy vitet. Ky trend pasqyron hemorragjinë demografike që është përshpejtuar pas pandemisë dhe lidhet kryesisht me kërkesën për paga më të larta dhe kushte më të mira jetese në vendet e Bashkimit Europian.
Kosova regjistroi përmirësim me ulje të emigracionit neto nga -22 mijë persona në 2024 në -18.5 mijë persona në 2025. Kjo rënie tregon stabilizim pas valës së parë të liberalizimit të vizave, megjithëse presioni për largim mbetet i lartë për shkak të papunësisë së të rinjve.
Serbia paraqet shifrat më të ulëta të emigracionit neto krahasuar me popullsinë e saj. Të dhënat tregojnë se politikat e brendshme në rajon nuk kanë arritur ende të frenojnë këtë fenomen.