Të dhënat e fundit të Eurostat tregojnë se për çdo 1000 banorë popullsia e Shqipërisë u reduktua me 12 persona gjatë vitit 2024. Kjo shifër përfaqëson shkallën bruto të migrimit neto dhe tregon tkurrjen e popullsisë.
Vetëm brenda vitit 2024 Shqipëria humbi rreth 29 000 banorë si pasojë e emigrimit. Ndërkohë mesatarja e Bashkimit Europian lëviz në shifra pozitive, rreth +5.2 për 1000 banorë.
Brenda rajonit të Ballkanit Perëndimor, Shqipëria mbetet ndër vendet më të prekura nga migrimi. Vende si Serbia shfaqin qëndrueshmëri më të lartë në raport me migrimin neto.
Ky fenomen përshpejton tkurrjen dhe plakjen e popullsisë. Lindshmëria ka rënë në nivele të ulëta, ndërsa ikja e të rinjve vazhdon. Çdo vit Shqipëria humbet popullsinë e një qyteti mesatar si Lezha apo Kavaja.
Në Europë migrimi neto pozitiv ndihmon shtetet të përballojnë plakjen e popullsisë. Në Shqipëri shifrat negative përshpejtojnë këtë proces. Vende si Estonia dhe Lituania, të cilat dikur kishin norma të ngjashme emigrimi, tani shënojnë migrim neto pozitiv.