Sipas raportit më të fundit të Eurostat, Shqipëria renditet si vendi me nivelin më të lartë të privimit të rëndë material dhe social në kontinent. Ky tregues vlerëson pamundësinë e qytetarëve për të përballuar të paktën shtatë nga trembëdhjetë mallra, shërbime apo aktivitete thelbësore për një standard jetese të denjë.
Në këto vështirësi përfshihen pagesa e qirasë dhe e faturave, përballimi i shpenzimeve të papritura, konsumi i rregullt i mishit ose i peshkut, mundësia për pushime, zotërimi i një automjeti, zëvendësimi i mobilieve, blerja e veshjeve të reja, mundësia për shpenzime personale, pjesëmarrja në aktivitete sociale dhe aksesi në internet.
Krahasimi rajonal dhe europian
Hendeku i Shqipërisë me vendet e tjera të rajonit mbetet i ndjeshëm:
- Maqedonia e Veriut: 11.6%
- Serbia: 10.3%
- Mali i Zi: 12.3%
Në nivel të Bashkimit Europian, mesatarja është 6.3%, ndërsa vendet me përqindjet më të larta në këtë grup janë Rumania me 16.8%, Bullgaria me 15% dhe Greqia me 14.9%. Të dhënat zyrtare tregojnë se numri i personave që jetojnë në privim të rëndë material në BE ka rënë nga 41 milionë në vitin 2015 në 27.5 milionë në vitin 2024.