Shqipëria ka miratuar për herë të parë Planin Kombëtar për Eliminimin e Hepatiteve Virale, duke u bërë pjesë e objektivit global të Organizatës Botërore të Shëndetësisë për eliminimin e hepatiteve B dhe C deri në vitin 2030. Lajmi u bë i ditur nga Kryeministri Edi Rama dhe Ministrja e Shëndetësisë dhe Mirëqenies Sociale, Evis Sala.
Sipas ministres Sala, ky dokument strategjik përfaqëson një angazhim konkret për forcimin e parandalimit, survejancës dhe diagnostikimit të hershëm. "Një sistem shëndetësor modern nuk pret që sëmundja të përparojë, por investon në parandalim dhe trajtim në kohë", theksoi ajo. Strategjia parashikon zgjerimin progresiv të kritereve të trajtimit, duke mundësuar që kujdesi shëndetësor të mos kufizohet vetëm te pacientët me forma të avancuara të sëmundjes.
Implementimi i planit mbështetet në një bashkëpunim të gjerë ndërmjet institucioneve shqiptare, ekspertëve kombëtarë dhe partnerëve ndërkombëtarë. Qendrat e specializuara do të mbeten pika kyçe, ndërsa synohet forcimi i shërbimeve rajonale dhe kujdesit parësor për të afruar shërbimet sa më pranë qytetarëve.
Hepatitet virale vlerësohen si një ndër shkaqet kryesore të cirrozës dhe kancerit të mëlçisë. Në këtë kontekst, lufta për eliminimin e tyre është integruar si një hallkë thelbësore e strategjisë kombëtare kundër kancerit, që përbën një nga prioritetet e ministrisë. Objektivat kryesore të kësaj nisme përfshijnë uljen e infeksioneve të reja, rritjen e numrit të diagnozave, përmirësimin e shëndetit publik dhe shpëtimin e më shumë jetëve.