Zyrtarët doganorë të Zyrës Doganore Kufitare Karasoviqi kanë parandaluar tentativën për futjen e paligjshme të 43 orëve të dorës në territorin e Bashkimit Evropian. Sipas njoftimeve të Administratës Doganore të Kroacisë, ngjarja ka ndodhur më 7 gusht 2026, ndërsa lajmi për publikun u bë i ditur gjatë javës së kaluar.
Automjeti me targa kroate, në të cilin u gjetën mallrat, drejtohej nga një shtetas i Republikës së Kosovës, i cili gëzon leje qëndrimi në Republikën e Kroacisë. Gjatë kontrollit të detajuar, zyrtarët gjetën një valixhe në sediljen e pasme të automjetit, brenda së cilës ndodheshin 43 orë dore të padeklaruara të markave të ndryshme.
Si pasojë e kësaj shkeljeje, drejtuesi i automjetit është gjobitur me shumën prej 6 mijë eurosh dhe ndaj tij është lëshuar një urdhër kundërvajtës. Autoritetet gjithashtu kanë ndërmarrë masën e sekuestrimit të mallrave. Procedura hetimore mbetet e hapur për shkak të dyshimeve se orët mund të jenë produkte që shkelin të drejtat e markave të mbrojtura, pasi mbi to janë vendosur shenja dalluese pa autorizimin e bartësve të të drejtave.