Shtetet Anëtare të Bashkimit Evropian vendosën më 22 prill 2026 të nisin hartimin e Traktatit të Anëtarësimit të Malit të Zi në BE.
Komisionerja për Zgjerimin, Marta Kos, reagoi në rrjetin social X, duke shkruar se "vendi i Malit të Zi brenda BE-së tani po merr formë". Ajo e përshkroi vendimin si "hap i madh në rrugën drejt anëtarësimit në BE, një njohje e qartë e progresit të Malit të Zi dhe një inkurajim për të përshpejtuar reformat".
Sipas Marta Kos, ky zhvillim lidhet ngushtë me reformat dhe përmbushjen e detyrimeve të vendosura nga BE. Ajo shtoi se procesi ofron mundësi për të nxjerrë mësime nga zgjerimet e mëparshme dhe për të përfshirë mekanizma më të fortë mbrojtës në traktatet e ardhshme, për të parandaluar kthimin pas në sundimin e ligjit dhe vlerat themelore.
Ndërkohë, sipas burimeve, Shqipëria është ende pa mbyllur asnjë kapitull në procesin e integrimit, për shkak të kundërshtimeve nga disa anëtarë të BE-së pas mbrojtjes së Belinda Ballukut nga Edi Rama dhe Partia Socialiste.
Përditësime
Qeveria e Malit të Zi synon anëtarësimin në BE deri në 2028.
Antonio Costa, Presidenti i Këshillit Evropian, e quajti vendimin “moment kyç” dhe u njoftua themelimi i Grupit të Punës për hartimin e Traktatit të Anëtarësimit.
Mali i Zi u pavarua në 2006 me rreth 600.000 banorë.