Ardita Sinani, kryetare e komunës së Preshevës, ngriti alarmin nga Tirana, ku ndodhet për samitin e diasporës, lidhur me përkeqësimin e situatës së shqiptarëve në Luginën e Preshevës. Ajo foli në emisionin "Ditari i pasdites" me Pandi Gjatën në A2 CNN.
Sinani deklaroi se tre komunat Preshevë, Bujanoc dhe Medvegjë po zbrazen për shkak të metodave moderne të spastrimit etnik në heshtje. "Tani shtypja dhe shkelja sistematike ka filluar me përmasë të madhe. Serbia po përdor metoda moderne të spastrimit etnik në heshtje, duke nxitur një shpërngulje të madhe jo vetëm me pasivizimin, por më e fundit që është shumë shqetësuese dhe shërbimi i detyrueshëm ushtarak", tha ajo.
Sipas Sinanit, diskriminimi shtrihet edhe në aspektin ekonomik dhe financiar. Serbia kufizon transfertat qeveritare ndaj komunave, nuk rrit investimet kapitale dhe pengon bizneset vendore si dhe investitorët e huaj. Komuna e Preshevës ka rritur pagat me 35% më tepër, ndërsa shpenzimet janë shtuar dhe mjetet nga niveli qendror janë shkurtuar.
Ajo përmendi se komuna ka konkurruar për 91 milionë dinarë në projekte infrastrukturore në ministritë përkatëse, por vetëm 9.5% janë realizuar. Kjo tregon, sipas saj, shkallën e diskriminimit social dhe ekonomik, pavarësisht pozicionit gjeostrategjik të Preshevës.