Autoritetet sllovene kanë vendosur kufizime të reja në furnizimin me karburant, duke lejuar individët të marrin maksimumi 50 litra në ditë, ndërsa operatorët e transportit deri në 200 litra. Masat hyjnë në fuqi nga e diela dhe do të qëndrojnë deri në një njoftim të dytë.
Vendimi vjen për shkak të rritjes së çmimeve të naftës në tregjet ndërkombëtare, të ndikuara nga tensionet në Lindjen e Mesme, si dhe fluksit të shoferëve nga Austria dhe Italia, që kërkojnë karburant më të lirë në Slloveni. Rezervat kombëtare konsiderohen të mjaftueshme, por kërkesa e lartë mund të shkaktojë probleme në shpërndarje.
Për të garantuar furnizimin e rregullt, qeveria ka angazhuar ushtrinë për të mbështetur transportin dhe menaxhimin në pikat e karburantit. Kompanitë e karburanteve janë detyruar të rrisin koordinimin, të raportojnë vazhdimisht gjendjen e pikave të shitjes dhe të përshpejtojnë shpërndarjen.
Kryeministri Robert Golob ka paralajmëruar se po shqyrtohet kufizimi i shitjes së karburantit për shtetasit e huaj. Mungesat janë ndjerë më fort te kompania Petrol, e cila është vënë nën kritika nga qeveria, ndërkohë që kompania deklaron se po punon për furnizim të qëndrueshëm. Nuk përjashtohen masa të tjera në ditët në vijim.
Përditësime
Kryeministri Robert Golob deklaroi se depozitat e karburantit janë plotësisht të mbushura dhe nuk pritet mungesë.
MOL Slovenia raportoi rritje të kërkesës në dy javët e fundit, për shkak të frikës për mungesë si pasojë e luftës në Iran, nga:
- qytetarët që krijojnë rezerva;
- "turistët e karburantit" për çmime më të ulëta.
Autoritetet sllovene kanë shpjeguar se kufizimi i karburantit në 50 litra në ditë lidhet me përgatitjet për zgjedhje. Përdoruesit me përparësi, si fermerët, mund të marrin deri në 200 litra në ditë.