Peter Sorensen, i dërguari evropian për dialogun, deklaroi se Bashkimi Evropian pret kontribut të rëndësishëm nga komisioni i përbashkët midis Kosovës dhe Serbisë për sqarimin e fatit të personave të zhdukur gjatë luftës së viteve 1998-’99 në Kosovë.
Sorensen e konfirmoi në një komunikatë të premten se palët zhvilluan takimin e parë trepalësh të këtij komisioni të enjten në Bruksel. Ai zhvilloi bisedime të gjata veç e veç me kryenegociatorin e Kosovës, Besnik Bislimi, dhe atë të Serbisë, Petar Petkoviq.
“Bashkimi Evropian ka pritshmëri të mëdha që Komisioni i Përbashkët të japë një kontribut të rëndësishëm në sqarimin e fatit të personave të zhdukur dhe në ndihmën për mbylljen e një kapitulli të dhimbshëm për familjet, të cilat kanë pritur tepër gjatë për përgjigje”, tha Sorensen.
Afër 1.600 njerëz vazhdojnë të jenë të pagjetur, pjesa më e madhe prej tyre shqiptarë. Palët arritën pajtueshmëri për themelimin e komisionit në dhjetor 2024. Ky komision buron nga Deklarata e përbashkët për personat e zhdukur, e arritur në 2023 në Bruksel si pjesë e dialogut për normalizimin e marrëdhënieve.
Qëllimi i komisionit është mbikëqyrja e zbatimit të kësaj deklarate, e cila synon zbardhjen e fatit të zhdukurve me forcë, mbylljen për familjet dhe nxitjen e pajtimit si dhe paqes së qëndrueshme.
Besnik Bislimi vlerësoi takimet si të suksesshme dhe tha se “arritëm që përfundimisht ta jetësojmë këtë objektiv” për funksionalizimin e komisionit. Petar Petkoviq e cilësoi si takimin e parë të këtij komisioni.
Përditësime
Komisioni mbështeti Grupin e Punës të kryesuar nga ICRC, i cili lehtëson zbatimin, zgjidh mosmarrëveshjet dhe monitoron progresin.
Takimi u zhvillua më 22 janar 2025, si vazhdim i diskutave për Termat e Referencës të miratuara në dhjetor 2024.
Bislimi dhe Petkoviq kryesojnë grupin. Në takimet e ardhshme do përfaqësohen nga zëvendësit e tyre, si Andi Hoti për Kosovën.