Maksim Ndoci dhe Juljan Kollçaku janë dërguar për gjykim nga SPAK më 8 janar 2026, në kuadër të procedimit penal nr. 296 të vitit 2021. Të pandehurit akuzohen për veprat penale "Trafikim i narkotikëve" në bashkëpunim në formën e grupit të strukturuar kriminal, "Grupi i strukturuar kriminal" dhe "Kryerje e veprave penale nga organizata kriminale dhe grupi i strukturuar kriminal", sipas neneve 283/a/1, 28/4, 333/a/2 dhe 334/1 të Kodit Penal.
Procedimi nisi pas kërkesës së autoriteteve italiane, konkretisht Prokurorisë së Republikës pranë Gjykatës së Firences dhe Drejtorisë Distriktuale Antimafia, në lidhje me procedimin penal nr. 9740/21 RGNR mod. 21. Hetimet italiane u nisën pas një kontrolli të Guardia di Finanza në portin e Livornos, midis 7-9 mars 2021, ku u identifikuan shtetas shqiptarë të kapur në flagrancë gjatë nxjerrjes së një ngarkese kokainë të ardhur nga Amerika Latine.
Grupi kriminal vepronte në Shqipëri (Durrës, Tiranë), Amerikën Latine (Ekuador, Panama) dhe Itali (provincat e Pizës, Piemontes dhe Trevizos). Përmes përgjimeve telefonike dhe ambientale, gjurmimeve GPS, vëzhgimeve, kontrolleve dhe shkëmbimeve të informacioneve, u dokumentua aktiviteti i këtij grupi me anëtarë shqiptarë, italianë dhe rumunë, si Albert Turja, Roland Turja, Alfred Veshti, Klodian Veshti, Luca Koci, Aurel Zhupa, Ionut Pislariu, Errico D’Ambrosio, Vincenzo Di Corso, Mario Spiritoso dhe Fabio Consale.
Gjatë hetimeve u sekuestruan qindra kilogramë kokainë në disa episode:
- Mbi 140 kg në portin e Livornos;
- Mbi 400 kg në Frattamaggiore (Napoli);
- Mbi 150 kg në Ekuador;
- Disa sekuestrime të tjera në Itali gjatë viteve 2021-2022.
Sipas SPAK, Maksim Ndoci dyshohet për rol në rikuperimin e mbi 140 kg ose 260 kg kokainë, ndërsa Juljan Kollçaku për përfshirje në trafikimin e mbi 489 kg ose 500 kg kokainë. Materialet procedurale i kalojnë Gjykatës së Posaçme për veprime të mëtejshme.