Prokuroria e Posaçme kundër Korrupsionit dhe Krimit të Organizuar (SPAK) kërkon 13 vite burg për biznesmenin e hidrokarbureve Rezart Taçi, i shpallur në kërkim ndërkombëtar. Ai akuzohet si pjesë e një grupi kriminal që synonte pastrimin e 18.399.941,50 eurove të mafias italiane nga llogaria e Francesco Zummo.
Kryeprokurori i SPAK, Klodian Braho, kërkoi gjithashtu konfiskimin dhe kalimin në favor të shtetit të rreth 18 milionë eurove. Llogaritë bankare janë të konfiskuara sipas vendimit të Gjykatës së Posaçme, e cila dënoi më parë Artur Ballën dhe Bledar Lilon.
Në dosjen e zbardhur nga gazetarja Anila Hoxha të Top Channel, shpjegohet plani i pastrimit të parave. Më 18 qershor 2021, në Tiranë u hapën llogari bankare në euro nga shtetasi italian Francesco Zummo (lindur më 16 nëntor 1932 në Palermo) dhe Fabio Petruzzella (lindur më 23 gusht 1962 në Palermo).
Udhëtimet e italianëve
• Të dy hynë në Shqipëri më 17 qershor 2021 nëpërmjet Aeroportit Rinas.
• Ora 20:52 të së njëjtës date dolën nga pika kufitare Muriqan drejt Malit të Zi, së bashku me Artur Ballën dhe Bledar Lilon, me automjetin e Mustafa Taçit.
• Më 18 qershor 2021, ora 12:08, hynë sërish në Shqipëri, hapën llogaritë dhe dolën me linjën Alitalia nga Rinas drejt Romës.
Në bankë, Petruzzella u prezantua si avokat i Zummos, ndërsa ky i fundit si biznesmen që donte të investonte në Shqipëri. Artur Balla është vëllai i bashkëshortes së Rezart Taçi.
Dosja përmend biseda ku thuhet se Taçi "ka bërë punë të madhe" dhe "është fuqi, e di mirë ç’duhet bërë".