Qeveria spanjolle bëri të ditur se do të paguajë 20 milionë euro kompensim për viktimat e aksidentit të trenave me shpejtësi të lartë, të ndodhur më 18 janarit pranë fshatit Adamuz në Andaluzi, afër qytetit të Kordobës. Në këtë përplasje humbën jetën 45 persona dhe u plagosën mbi 150 të tjerë. Aksidenti është ndër më të rëndët në Spanjë që nga viti 2013 dhe në Evropë kohët e fundit.
Ministri i Transportit Oscar Puente shpjegoi se familjet e viktimave do të marrin secila 216 000 euro brenda një afati maksimal prej tre muajsh. Kjo shumë përfshin 72 000 euro lehtësim tatimor nga qeveria, 72 000 euro pagesë paraprake sigurimi dhe 72 000 euro nga sigurimi i detyrueshëm i udhëtarëve. Për të lënduarit, pagesat do të lëvizin nga 2 400 euro deri në 84 000 euro, varësisht nga dëmet.
Puente theksoi se procedurat e zakonshme ligjore nuk përgjigjen urgjencave të tilla, pasi familjet nuk mund të presin vite për mbështetje. Ai deklaroi se ka ndërgjegje të pastër, po kryen detyrën sa më mirë dhe po komunikon të gjitha informacionet me qytetarët.
Ministri ndodhet nën presion publik pas këtij incidenti dhe ngjarjeve të tjera në të njëjtën javë, si vdekja e një makinisti në Katalonjë dhe dy aksidente të tjera pa viktima. Shërbimi lokal i trenave Rodalies në Katalonjë u ndërpre për shkak të refuzimit të makinistëve për siguri, duke lënë mijëra pasagjerë të izoluar, si dhe një defekti softuerik.
Partia Popullore, forca kryesore opozitare, kërkoi dorëheqjen e Puentes.