Ish-ministrja e Jashtme Elisa Spiropali reagoi ndaj protestës së studentëve shqiptarë në Shkup për të drejtën e provimit në gjuhën shqipe. Në postimin e saj në rrjetet sociale ajo deklaroi se problemi nuk është procedural, por thellësisht politik, institucional dhe moral.
Spiropali shkroi se barazia e shqiptarëve ende trajtohet si kompromis politik dhe jo si themel kushtetues i shtetit. Ajo theksoi se gjuha shqipe përfaqëson dinjitet, kujtesë dhe identitet, dhe nuk mund të reduktohet në përkthim administrativ.
Sipas deputetes socialiste, shqiptarët në Maqedoninë e Veriut nuk kërkojnë privilegje, por të drejta që duhet të ishin zgjidhur prej kohësh. Ajo kërkoi që gjuha shqipe dhe të drejtat kolektive të shqiptarëve të përcaktohen qartë dhe pa ekuivok në Kushtetutën e shtetit, si standard kushtetues dhe demokratik.