Ish-ministrja për Evropën dhe Punët e Jashtme e Shqipërisë, Elisa Spiropali, ka dënuar ashpër deklaratën e ministres së Administratës Publike dhe Vetëqeverisjes Lokale të Serbisë, Snezhana Paunoviç. Në një intervistë, ministrja serbe pretendoi se, nëse do të kishte pasur mundësi në kohën e luftës, do të kishte ndjekur rrugën e ish-presidentit Sllobodan Millosheviç për të spastruar etnikisht Kosovën.
Në një reagim përmes rrjeteve sociale, Spiropali e cilësoi këtë qëndrim si të papranueshëm për një përfaqësuese të një qeverie që aspiron integrimin në Bashkimin Europian. Sipas saj, shprehja e keqardhjes se "nuk u vranë mjaftueshëm fëmijë, gra, burra e të moshuar" në Kosovë përbën "barbarizëm verbal" dhe jo një mendim politik.
Spiropali theksoi se institucionet europiane nuk mund të mbeten indiferente ndaj kësaj retorike, pasi mbrojtja e kujtesës së viktimave është një ndër parimet themelore mbi të cilat është ndërtuar Europa. Ajo shtoi se kushdo që glorifikon krimet e luftës nuk mund të jetë partner i vlerave europiane dhe duhet të mbajë përgjegjësi politike, institucionale dhe humane.
Ish-ministrja vuri në dukje se liria e Kosovës është fituar me gjak dhe nuk i është dhuruar askujt. Në përfundim, ajo paralajmëroi se një gjuhë e tillë jo vetëm që e turpëron Serbinë, por rrezikon drejtpërdrejt bashkëjetesën paqësore me vendet fqinje dhe vë në pikëpyetje seriozitetin e Serbisë në rrugën drejt integrimit europian.
Përditësime
Kryetarja e Kuvendit, Elisa Spiropali, ka dënuar ashpër deklaratën e ministres serbe lidhur me Kosovën. Spiropali e cilësoi retorikën e saj si mbështetje për aktet kriminale, duke u shprehur: 'Zoti e ruajt këtë monstër që duartroket dhe glorifikon krimet'.