Elisa Spiropali, ish-ministrja e Jashtme dhe deputete e Partisë Socialiste, reagoi më 24 mars 2026 për përvjetorin e 27-të të ndërhyrjes ushtarake të NATO-s kundër Serbisë, e cila i dha fund luftës në Kosovë.
Në një mesazh në Facebook, Spiropali shkruan se më 24 mars 1999 bota demokratike vendosi të mos priste më dhe bombardoi, sepse Kosova po zhbëhej para syve të botës. "Ndërhyrja nuk erdhi si luks i fuqisë, por si detyrim i ndërgjegjes. Ishte momenti kur Perëndimi nuk e mati veten me interes, por me përgjegjësi", thekson ajo.
Spiropali shton se kjo ditë nuk i përket vetëm kujtesës së Kosovës, por biografisë morale të NATO-s. "Aleanca nuk mbrojti vetëm një popull. Mbrojti kuptimin e vetes", shkruan ish-ministrja.
Ajo vë në dukje se sot, 27 vjet më pas, bota është më e ndarë, vendimet më të ngadalta dhe ndërhyrja nuk është më refleks, por dilemë. Megjithatë, viti 1999 mbetet provë se neutraliteti ndonjëherë nuk ishte paqe, por dorëzim.
Spiropali përfundon: "Kosova nuk është vetëm histori çlirimi. Është kujtesë për gjithë botën se forca, kur vihet në shërbim të jetës, nuk është kërcënim. Është detyrë. 24 Marsi mbetet. Edhe kur gjithçka tjetër lëviz."