Ministrja e Shëndetësisë dhe Mbrojtjes Sociale, Evis Sala, vizitoi më 25 prill Spitalin e Kavajës, i njohur si Qendra Spitalore Rajonale “Shefqet Ndroqi”. Gjatë vizitës, ajo njoftoi se ky institucion shkëputet nga Spitali Universitar “Shefqet Ndroqi” dhe merr statusin e spitalit bashkiak, duke fituar autonomi më të madhe në menaxhim dhe organizim të shërbimeve.
Ky transformim është pjesë e reformës spitalore në Shqipëri, që synon afrimin e shërbimit shëndetësor te pacienti. Evis Sala deklaroi: “Kam ardhur me një lajm të mirë. Qendra Spitalore Rajonale Kavajë shkëputet nga Spitali Universitar ‘Shefqet Ndroqi’ dhe bëhet një spital bashkiak. Është një risi, por edhe një hap i duhur në kuadër të reformës spitalore. E gjithë ideja e reformës është që shërbimi të vijë sa më afër pacientit dhe ata ta marrin shërbimin pa lëvizur nga një spital në tjetrin, si dhe të fuqizojmë spitalet rajonale dhe ato bashkiake.”
Gjatë vizitës u prezantua drejtori i ri i Spitalit Bashkiak Kavajë, Arben Rrugia, mjek i njohur në qytet, i cili do të drejtojë institucionin në fazën e re të zhvillimit. Ministrja u takua me mjekët dhe personel shëndetësor, ku apeloi për bashkëpunim të ngushtë, rritje të cilësisë së shërbimit dhe angazhim të përbashkët në dobi të pacientëve dhe komunitetit.
Në vizitë mori pjesë edhe kreu i Grupit Parlamentar të Partisë Socialiste, Taulant Balla, i cili vlerësoi nevojën për këtë ndryshim. Ai theksoi se Kavaja ka popullsi vendase dhe 1 milion turistë në Golem, të cilët deri tani dërgoheshin në spitale të tjera për trajtim. Spitali disponon 86 shtretër dhe pozicion gjeografik qendror, duke e bërë të përshtatshëm për shërbim më të mirë.