Drejtuesi politik i Partisë Socialiste për qarkun e Tiranës, Taulant Balla, zhvilloi një inspektim në terren lidhur me punimet që po kryhen nga Autoriteti Rrugor Shqiptar (ARRSH) për hapjen, sistemimin dhe asfaltimin e hyrje-daljeve në rrugën dytësore të Kavajës.
Sipas Ballës, ndërhyrja po i jep zgjidhje një problematike të kahershme, e cila ka vështirësuar lëvizjen e banorëve, të bizneseve dhe aksesin drejt Spitalit të Kavajës. Gjatë vizitës, ai theksoi rëndësinë e këtij investimi në funksion të planeve të Ministrisë së Shëndetësisë për transformimin e këtij spitali në një qendër rajonale urgjence.
"Në momentin që spitali do të funksionojë si qendër rajonale urgjence, mbërritja atje do të numërohet me sekonda. Në emergjencë, koha shpëton jetë", u shpreh Balla. Ai njoftoi se do t'i kërkohet ARRSH-së krijimi i një hyrje-daljeje të drejtpërdrejtë për institucionin spitalor, me qëllim shmangien e devijimeve.
Ndërhyrja pritet të ketë ndikim edhe në ekonominë lokale. Si shembull, u përmend një biznes karburanti që kishte ndërprerë aktivitetin për shkak të mungesës së hyrjes, i cili pritet të rifillojë punën pas përfundimit të punimeve. Në mbyllje të inspektimit, Balla kërkoi angazhim më të madh për pastrimin dhe mirëmbajtjen e hapësirave përgjatë akseve rrugore, duke vlerësuar potencialin zhvillimor të zonës.