Spitali i Përgjithshëm në Pejë u është drejtuar institucioneve qendrore dhe lokale me një apel për ndërhyrje urgjente në largimin e mbeturinave nga ambientet e këtij institucioni. Drejtuesit e spitalit bëjnë të ditur se situata e krijuar, si pasojë e zjarrit në deponinë e Sferkës, po cenon rëndë kushtet higjieno-sanitare dhe po rrit rrezikun e përhapjes së infeksioneve.
Sipas njoftimit, si institucion që ofron shërbime shëndetësore 24 orë në ditë, spitali prodhon sasi të konsiderueshme mbeturinash që nuk mund të ruhen për periudha të gjata në hapësirat e tij. Në reagim theksohet:
- Shëndeti i pacientëve, stafit dhe qytetarëve është prioritet mbi çdo sfidë tjetër operative.
- Spitali nuk kërkon trajtim të privilegjuar, por trajtim prioritar për shkak të natyrës së veprimtarisë së tij.
- Institucioni ka shlyer me rregull të gjitha detyrimet kontraktuale dhe financiare ndaj kompanisë përgjegjëse për grumbullimin e mbeturinave.
Spitali nënvizon se situata nuk është pasojë e menaxhimit të brendshëm, por kërkon një koordinim më të mirë institucional për të garantuar vazhdimësinë e shërbimeve jetike për qytetarët.