Gazetari grek me origjinë shqiptare, Antilian Kotzai, është bërë shënjestër e një fushate fyese dhe raciste në rrjetet sociale, pasi publikoi një artikull në gazetën greke Documento me titull "Kujdes, ideologjia e Agimit të Artë është këtu". Në këtë shkrim, Kotzai analizoi thirrjet e qarqeve të ekstremit të djathtë për "çlirimin" e lagjes Agios Panteleimonas në Athinë, duke paralajmëruar se retorika e tyre po rikthen atmosferën e pogromeve ndaj emigrantëve.
Pas shpërndarjes së shkrimit në rrjetet sociale, gazetari, i cili është shtetas grek, raportoi se mori mesazhe kërcënuese dhe fyese, përfshirë thirrjet për t'u kthyer në Shqipëri pasi gjoja do të ishte "mysafir" në Greqi. Përveç komenteve raciste, ai u përball edhe me kërcënime për ndjekje ligjore për shkak të qëndrimeve të tij mbi rrezikun që këto ideologji përbëjnë për demokracinë.
Kotzai theksoi se nuk do të heshtë përballë këtyre sulmeve, duke pohuar se ai dhe qindra mijëra fëmijë të tjerë emigrantësh janë qytetarë grekë me të drejta të plota. Në artikullin e tij, ai rikujtoi gjithashtu aktivitetin e ish-drejtuesit të Agimit të Artë, Ilias Kasidiaris, i cili u shpall fajtor në vitin 2020 për drejtimin e një organizate kriminale, por që vazhdon të shfaqë synime për t'u përfshirë në politikën greke.
Ngjarja ka shkaktuar reagime të gjera solidariteti, kryesisht nga gazetarë dhe politikanë të krahut të majtë, të cilët e cilësuan incidentin si një sulm të organizuar racist. Sipas mbështetësve të tij, agresioni ndaj Kotzait vetëm sa konfirmon shqetësimet që ai kishte ngritur mbi rritjen e ndikimit të ekstremit të djathtë në shoqërinë greke.