Gjykata Supreme e Kosovës ka shpallur të paligjshëm dhe shfuqizuar paragrafin 5 të nenit 5 të Udhëzimit Administrativ Nr. 09/2015 të Ministrisë së Punës dhe Mirëqenies Sociale (MPMS). Ky udhëzim rregullon kategorizimin e përfituesve të pensionit kontribut-pagues sipas strukturës kualifikuese arsimore dhe kohëzgjatjes së pagesës së kontributeve.
Aktgjykimi u mor në çështjen P.A.nr.1/2026, ku Gjykata Supreme miratoi si të bazuar kërkesëpadinë e paditësit Sh.S. kundër Ministrisë së Financave, Punës dhe Transfereve (MFPT) – Departamenti i Pensioneve. Data e vendimit është 25 mars 2026.
Sipas arsyetimit, dispozita e kontestuar nuk ka bazë ligjore dhe përbën tejkalim të autorizimit ligjor. Ligji përkatës për skemat pensionale lidh të drejtën në pension me pagesën e kontributeve dhe përmbushjen e kushteve ligjore, jo me kohën e fitimit të kualifikimit arsimor.
Gjykata vlerëson se kufizimi për kualifikimet e fituara pas datës 01.01.1991 është arbitrar, pa qëllim legjitim të qartë dhe joproporcional. Ai përjashton një kategori pensionistësh që kanë përmbushur kushtet, duke cenuar parimin e barazisë para ligjit dhe sigurinë juridike.
Dispozita cenon gjithashtu Ligjin për Skemat Pensionale të Financuara nga Shteti dhe parimet themelore të rendit juridik, duke krijuar dallim të pajustifikuar mes pensionistëve në rrethana të ngjashme.
Përditësime
Supremja specifikoi nivelet e pensioneve:
- Për kontributpagues: 218-318 euro, varësisht arsimit;
- Për moshën: 150 euro.
Ministria obligohet të kompensojë shpenzimet gjyqësore prej 618 euro.
Aktgjykimi hyn në fuqi menjëherë dhe publikohet në Gazetën Zyrtare.