Xhelal Sveçla, ministër i Punëve të Brendshme, zhvilloi sot një takim pune me zyrtarët e gjendjes civile të komunave të rajonit të Mitrovicës, si dhe me zyrtarët përkatës të Ministrisë së Punëve të Brendshme (MPB), të angazhuar në zbatimin e Ligjit për Automjete dhe Ligjit për të Huaj. Këta ligje hynë në fuqi më 15 mars 2026.
Gjatë takimit, ministri Sveçla falënderoi të pranishmit për angazhimin e tyre dhe theksoi rëndësinë e koordinimit të vazhdueshëm ndërmjet nivelit qendror dhe atij lokal. Qëllimi është zbatimi unifikuar dhe efikas i vendimeve të fundit të MPB-së.
Ai nënvizoi se roli i zyrtarëve është thelbësor për mbarëvajtjen e këtij procesi. Informimi në kohë dhe i saktë i qytetarëve, si dhe bashkëpunimi me ta, janë elemente kyçe për arritjen e rezultateve të synuara.
Ministri Sveçla deklaroi se MPB po punon me kapacitet të plotë institucional për të siguruar zhvillimin e procesit sipas dinamikës së paraparë dhe standardeve ligjore në fuqi. Ai shtoi se ministria është në koordinim të ngushtë me komunat, Policinë e Kosovës dhe Agjencinë e Regjistrimit Civil, për të garantuar zbatimin e plotë të obligimeve ligjore nga të gjitha palët.
Për lehtësimin e zbatimit, MPB ka themeluar ekipe të veçanta mbështetëse. Këto ekipe do të ofrojnë asistencë dhe sqarime për çdo paqartësi gjatë trajtimit të kërkesave, duke rritur efikasitetin e procedurave administrative.
Ministria e Punëve të Brendshme mbetet e përkushtuar për zbatimin e plotë të legjislacionit në fuqi dhe forcimin e bashkëpunimit ndërinstitucional, në funksion të shërbimeve cilësore për qytetarët.