Ministri i Punëve të Brendshme, Xhelal Sveçla, ka njoftuar se duke filluar nga e hëna, 17 gusht 2026, Zyra për Shtetësinë do të zhvendoset në një lokacion të ri brenda objektit të Agjencisë për Regjistrim Civil. Ky ndryshim synon ofrimin e kushteve më të mira dhe një shërbim më efikas për qytetarët që janë në proces të fitimit, rifitimit apo humbjes së shtetësisë.
Sipas njoftimit, me qëllim të shkurtimit të kohës së pritjes dhe zvogëlimit të radhëve nëpër sportele, është rritur edhe numri i stafit mbështetës. Ministri Sveçla ka bërë të ditur se, gjatë periudhës gjashtëmujore nga janari deri në qershor të vitit 2026, janë regjistruar rreth 5 mijë aplikime për këto procedura.
Krahas shërbimit fizik, qytetarët vazhdojnë të kenë në dispozicion aplikimin online përmes platformës shtetërore e-Kosova, e cila synon thjeshtimin e procesit dhe rritjen e qasshmërisë. Ky riorganizim pason hyrjen në fuqi të Ligjit për Shtetësinë të Republikës së Kosovës, i cili ka nisur të zbatohet nga 22 maji 2026.