Deputeti i zgjedhur i Partisë Demokratike të Kosovës (PDK), Arian Tahiri, deklaroi se Kryeministri Albin Kurti nuk do ta mbështesë Presidenten Vjosa Osmani për mandate të tjera ose role të rëndësishme shtetërore.
Në një intervistë për Blic, Tahiri shprehu bindjen se bashkëpunimi mes Kurtit dhe Osmanit nuk do të vazhdojë. “Sipas mendimit tim, Kurti dhe Osmani nuk janë në linjën e njëjtë. Unë nuk besoj se do të shkohet me Vjosa Osmanin. Kurti do të shkojë tek personalitete tjera, ku ai e shtrin kontrollin e tij direkt”, tha ai.
Tahiri vlerësoi se Kurti ka kaluar në një nivel tjetër të nevojave politike, ku synon monopolin në përfaqësimin e Kosovës në arenën ndërkombëtare. Ai tha se kreu i qeverisë dëshiron të eliminojë figura të pavarura dhe të kontrollojë plotësisht përfaqësimin shtetëror.
Sa i përket opozitës, Tahiri theksoi rolin e saj në procesin e zgjedhjes së presidentit. “Ne duhet ta luajmë rolin tonë këtu, sepse ka burra e gra nga PDK-ja dhe partitë e tjera, po ashtu edhe jo partiakë, të cilët e përfaqësojnë interesin e Kosovës dhe do të ishin adresë e besueshme për ndërkombëtarët”, deklaroi ai.