Kryetari i grupit parlamentar të Partisë Socialiste, Taulant Balla, është takuar të mërkurën në Tiranë me Endrit Thaçin, djalin e ish-presidentit të Kosovës, Hashim Thaçi. Lajmin e ka bërë të ditur vetë Balla përmes një postimi në rrjetin social Facebook, ku ka ndarë edhe një fotografi nga takimi.
Në mesazhin e tij, Balla ka shprehur dëshirën që pas një muaji ish-presidenti Thaçi të bashkohet me ta. Aktualisht, Hashim Thaçi ndodhet në paraburgim në Hagë prej rreth 6 vitesh. Zhvillimet gjyqësore pritet të arrijnë një moment përfundimtar gjatë muajit korrik, kur është parashikuar dhënia e vendimit për rastin e njohur si “Thaçi dhe të tjerët”.