Mijëra qytetarë janë mbledhur sot në kryeqytet për të zhvilluar protestën e nëntë radhazi kundër qeverisë. Tubimi u shndërrua në një marshim, i cili nisi nga sheshi “Nënë Tereza” dhe përshkoi akset kryesore të qytetit deri në “Rrugën e Kavajës”.
Sipas raportimeve, vargu i pjesëmarrësve ka arritur një gjatësi prej mbi 1.5 kilometrash. Protestuesit mbanin pankarta dhe flamuj kombëtarë, ndërsa gjatë marshimit dëgjoheshin thirrje kundër qeverisë dhe kryeministrit Edi Rama. Qytetarët kanë deklaruar se do të vijojnë rezistencën në rrugët e Tiranës deri në plotësimin e kërkesës së tyre për dorëheqjen e kreut të qeverisë.