Mbrëmjen e 13 marsit është regjistruar trafik i rënduar në autostradën Tiranë-Elbasan. Me qindra automjete kanë mbetur në radhë nga dalja e tunelit të Krrabës deri në zonën e Bradasheshit.
Drejtuesit e automjeteve bëjnë të ditur se lëvizja është ngadaltë dhe pothuajse e paralizuar në disa segmente. Ata presin me orë për të hyrë në Elbasan. Nuk ka njoftim zyrtar për shkakun e situatës.
Trafiku është rënduar nga fluksi i lartë i mjeteve që drejtohen drejt Elbasanit me rastin e Ditës së Verës. Kjo nuk është hera e parë që ndodh një fenomen i tillë. Çdo fundjavë qytetarët që shkojnë drejt Elbasanit dhe më tej, drejt juglindjes për pushime, përballen me radhë të gjata.
Prej kohësh kjo nyjë konsiderohet shqetësuese nga ekspertët rrugorë. Ata kanë kërkuar ndërtimin e një mbikalimi për të shkarkuar trafiku dhe për të shmangur problemin që përsëritet rregullisht.