Mjekët në Spitalin Moorfields Eye Hospital të Londrës kanë aplikuar një trajtim të ri me injeksion në sy te pacientët e prekur nga hipotonia, një çrregullim i rrallë që ul presionin brenda syrit dhe mund të çojë në verbëri. Ky spital është klinika e parë në botë e specializuar për këtë sëmundje.
Sipas një studimi pilot, shtatë nga tetë pacientë kanë reaguar pozitivisht ndaj terapisë. Pacientja e parë në botë, Nicki Guy, 47 vjeçe, ka ndarë historinë e saj me BBC. Ajo ka kaluar nga një shikim i turbullt, ku numëronte vetëm gishta dhe përdorte lupë për leximin nga afër, në aftësinë për të lexuar pothuajse të gjitha rreshtat në tabelën e testimit të shikimit. Aktualisht, ajo është vetëm një rresht larg standardit ligjor për drejtimin e automjeteve.
Nicki Guy ka deklaruar: “Është diçka që ta ndryshon jetën. Ma ka kthyer gjithçka. Mund ta shoh fëmijën tim duke u rritur. Kam kaluar nga numërimi i gishtave dhe një pamje shumë e turbullt, në aftësinë për të parë sërish”. Ajo ka shtuar: “Nëse shikimi im mbetet kështu për pjesën tjetër të jetës sime, do të ishte fantastike. Ndoshta nuk do të mund të vozisë më kurrë, por këtë e pranoj me kënaqësi”.
Hipotonia ndodh kur presioni brenda syrit bie në nivele shumë të ulëta, duke bërë që syri të humbë formën dhe të shembet mbi veten. Kjo mund të vijë nga prodhimi i dobët i lëngut natyral brenda syrit, trauma, inflamacione, operacione në sy ose efekte anësore të ilaçeve.
Deri tani, trajtimet përfshinin steroidë ose vaj silikoni për të rikthyer formën e syrit, por këto metoda mund të jenë toksike me kalimin e kohës dhe nuk rikthejnë ndjeshëm shikimin. Trajtimi i ri përfshin injeksionin e një xheli, i cili duket më efektiv për ruajtjen e shikimit.