Fondi Shqiptar i Zhvillimit (FSHZH) ka shpallur procedurën e prokurimit për riorganizimin e hapësirës publike të sheshit “Nënë Tereza” në Tiranë, në kuadër të projektit “Ndërtimi i nyjeve multimodale të mobilitetit, Rajoni 1&2”. Ndërhyrja ka si synim kryesor kthimin e sheshit në një zonë të dedikuar për këmbësorët, duke zhvendosur fluksin e automjeteve në një unazë nëntokësore.
Struktura nëntokësore parashikon zhvillimin e një unaze qarkullimi që do të rrethojë zonën e parkimit. Qasja e automjeteve në këtë unazë do të realizohet nëpërmjet tri rampave me nga dy korsi: një në Bulevardin “Dëshmorët e Kombit”, mes Pallatit të Kongreseve dhe Presidencës, dhe dy të tjera në rrugën “Lek Dukagjini”, përballë korpusit universitar. Korridori i qarkullimit nëntokësor është projektuar me korsi prej 3.5 metrash, duke përfshirë kalime për personelin dhe emergjencat.
Kompleksi nëntokësor përfshin këto funksione:
• Parkim me kapacitet prej rreth 170 vendesh në kuotën -7.75 metra.
• Shesh i zhytur multifunksional në kuotën -4 metra, që shërben si pikë shpërndarëse.
• Muze arkeologjik, i cili do të shtrihet deri në thellësinë 19 metra, me një hapësirë pritjeje prej 500 metra katrorë.
• Kapelë kushtuar Nënë Terezës me një sipërfaqe prej 700 metra katrorë.
• Ambient për bar-restorant prej 340 metra katrorë.
Sipas dokumentacionit teknik, ndërtimi do të realizohet përmes një sistemi me kolona, trarë dhe pllaka prej betoni të armuar. Synimi kryesor i projektit është ruajtja e karakterit monumental të sheshit dhe marrëdhënieve vizuale me ndërtesat historike përreth, duke shmangur ndërtimet e reja mbi sipërfaqe.