Kompanitë e transportit të mallrave tregtare në rrugë tokësore dhe detare në Shqipëri kanë nisur të aplikojnë tarifa 6-10% më të larta që nga 4 marsi 2026. Kjo vjen pas rritjes së çmimit të naftës në bursat e huaja, e nxitur nga konflikti në Lindjen e Mesme.
Drejtuesit e kompanive pohuan se prej fundjavës furnizohen me naftë me çmim 10% më të lartë, ose deri 25 lekë më shumë për litër. Nafta zë 60-70% të kostos totale të transportit, prandaj çdo rritje reflektohet menjëherë në tarifa.
Rodolf Xhillari, drejtues i kompanisë Balkan Trans Albania, deklaroi se tarifat tokësore janë rritur me 6-7%. «Çmimi i naftës është rritur me 10%, duke ndikuar drejtpërdrejt në tarifat e transportit, të cilat në vend janë rritur nga 6 në 7%. Nafta përbën 60-70% të kostos totale të transportit. Në vend ekzistojnë pabarazi, konkurrencë e pa ndershme dhe inflacion, prandaj rritja nuk është reflektuar në të njëjtën masë me atë të naftës», tha ai.
Sipas operatorëve, tarifa për eksport mallrash nga Durrësi në Milano në rrugë tokësore kaloi nga 1500-1700 euro në 1600-1800 euro për kamion. Për import nga Milano në Durrës, nga 2500 euro në 2700 euro.
Edhe transporti detar ka parë rritje 10% prej fundjavës. Artur Dedja nga Dedja Shipping shpjegoi se nisja e sulmeve shkaktoi frikë dhe pasiguri te operatorët, të cilët nxituan të siguronin furnizimet me karburant. Ai përmendi se Irani, si pjesë e OPEC-ut, po godet rafineritë e rajonit për të krijuar pasiguri në treg.
Burimet parashikojnë se rritja e çmimit të naftës mund të reflektohet shpejt edhe në tregun e shitjes me pakicë.