Çmimet e naftës në bursat ndërkombëtare kanë shënuar rritje të ndjeshme, të nxitura nga përshkallëzimi i tensioneve mes Shteteve të Bashkuara dhe Iranit, si dhe frika për ndërprerje të furnizimeve përmes Ngushticës së Hormuzit. Treguesi referencë Brent është ngjitur pranë kuotës së 85 dollarëve për fuçi, ndërsa nafta amerikane WTI tregtohet rreth 80 dollarëve, nivelet më të larta në gati një muaj.
Sipas të dhënave nga Doganat, kjo rritje është reflektuar në tregun vendas, ku çmimi i naftës ka arritur në 196-198 lekë për litër. Operatorët tregtarë bëjnë me dije se lëvizja lidhet me shtrenjtimin e treguesit Platts, i cili ka arritur në 1203 dollarë për ton, nga 952 euro që ishte në fund të qershorit. Kësaj kostoje i shtohet edhe një premio prej 30 dollarësh për sigurimin dhe transportin.
Shqipëria vijon të mbajë çmimin më të lartë të naftës në rajon, fakt që sipas operatorëve lidhet me ngarkesën e lartë fiskale, e cila zë rreth gjysmën e çmimit final. Struktura fiskale në Shqipëri përbëhet nga:
- Taksa e qarkullimit: 27 lekë për litër.
- Akciza: 39.4 lekë për litër.
- Taksa e karbonit: 3 lekë për litër.
- TVSH: 20% mbi çmimin final.
Situata në tregjet ndërkombëtare mbetet e ndjeshme për shkak të kërcënimeve mbi furnizimet dhe sulmeve ndaj infrastrukturës ruse të rafinerive, të cilat kanë kufizuar më tej eksportet globale të karburanteve.