Shoqata Kombëtare e Transportit Qytetas i është drejtuar kryeministrit Edi Rama me pesë kërkesa për t’u përfshirë në Paketën Fiskale 2027. Në shkresën e datës 29 tetor, të firmosur nga kryetari i shoqatës, Kostandin Foni, kërkohet që propozimet të shqyrtohen përpara miratimit të paketës.
Shoqata kërkon përjashtimin e autobusëve të regjistruar dhe të licencuar për transport publik qytetas nga taksa e re e qarkullimit, nëse ajo vendoset si taksë vjetore mbi automjetet. Sipas saj, taksa aktuale e qarkullimit mbi gazoilin është 32 lekë për litër, pa përfshirë TVSH-në. Propozimi parashikon një dispozitë të posaçme ligjore dhe verifikim përmes licencave, dokumenteve të mjeteve dhe regjistrave të autoriteteve.
Për akcizën, shoqata kërkon përjashtimin e gazoilit të përdorur ekskluzivisht për transportin publik. Nëse kjo nuk zbatohet, propozon rimbursim mujor ose tremujor për sasitë e dokumentuara. Përfitimi do të lidhej me faturat e furnizimit, licencat e transportit, mjetet e regjistruara dhe kilometrat e realizuar sipas programeve të miratuara.
Shoqata argumenton se operatorët nuk mund t’i përshtatin në mënyrë të njëanshme tarifat e biletave sipas luhatjeve të çmimit të karburantit, pasi shërbimi zhvillohet me tarifa dhe itinerare të përcaktuara. Në shkresë përmenden kostot e karburantit, pagave, mirëmbajtjes, siguracioneve dhe detyrimeve fiskale. Sipas dokumentit të shoqatës, propozimet fiskale parashikojnë rritjen e normës standarde të TVSH-së nga 20% në 21%.
Shoqata kërkon uljen e TVSH-së për transportin publik qytetas të udhëtarëve në 6%. Ajo propozon gjithashtu trajtim më të favorshëm të TVSH-së për karburantin, pjesët e këmbimit, mirëmbajtjen dhe investimet në autobusë, si dhe shqyrtimin e së drejtës për kreditimin e TVSH-së së blerjeve. Nëse norma e reduktuar nuk është e realizueshme ose efektive, propozohet shqyrtimi i një mekanizmi kompensimi buxhetor për kostot shtesë të provuara.
Një tjetër kërkesë është që ndryshimet fiskale të mos sjellin rritje automatike të çmimit të biletave dhe të mos cenojnë kontratat ekzistuese. Shoqata kërkon përfshirjen e përfaqësuesve të saj në konsultimet me institucionet, përmes një grupi të përbashkët teknik me Ministrinë e Financave, Ministrinë e Infrastrukturës dhe Energjisë dhe autoritetet vendore.
Ajo ngre gjithashtu shqetësimin për vonesat në disbursimin e subvencioneve dhe kompensimeve, kostot e transportit falas ose me tarifa të reduktuara për kategori të caktuara qytetarësh dhe nevojën për rinovimin e flotës. Kërkohet analizë e kostove reale të sektorit dhe e ndikimit të lehtësirave të propozuara në buxhetin e shtetit dhe atë vendor, si dhe një takim konsultativ përpara përfundimit të procedurave parlamentare.