Gjatë 24 orëve të fundit, strukturat policore të Qarkut Kukës kanë zhvilluar tre operacione të koduara, të cilat çuan në vënien në pranga të tre shtetasve për vepra të ndryshme penale. Në Tropojë, në kuadër të operacionit “Befasia”, u arrestua shtetasi E. M., 45 vjeç, banues në Markaj. Gjatë kontrollit në banesën e tij, forcat e rendit gjetën një armë zjarri automatike dhe municion luftarak.
Në një tjetër operacion në Tropojë, të koduar “Weekend”, u arrestua në flagrancë S. H., 38 vjeç. Ai dyshohet për kultivimin e 42 bimëve narkotike kanabis, të konstatuara nga policia në një zonë të pyllëzuar në Njësinë Administrative Tropojë e Vjetër. Gjatë kontrollit fizik, këtij shtetasi iu gjet një pistoletë me krehër dhe 9 fishekë, ndërsa në banesë iu sekuestruan një armë gjahu, municione dhe një thikë.
Ndërkohë, në Kukës, operacioni i koduar “Hija” solli zbardhjen dhe dokumentimin e dy vjedhjeve me thyerje. Për këto raste u arrestua I. J., 31 vjeç, banues në Krumë të Hasit. Sipas hetimeve, më 26 shtator 2026, i dyshuari vodhi një automjet dhe një lokal, ku mori edhe një aparat celular. Provat materiale, përfshirë automjetin dhe thikën e përdorur, janë sekuestruar. Policia njoftoi se vijojnë hetimet për të përcaktuar nëse ky shtetas është autor edhe i vjedhjeve të tjera në zonën e Hasit dhe Durrësit. Të gjitha materialet procedurale i janë përcjellë Prokurorisë pranë Gjykatës së Shkallës së Parë të Juridiksionit të Përgjithshëm Kukës.