Policia e Kosovës ka ndërmarrë masa ndaj tre lokaleve në Shtime pas ankesave të banorëve për zhurmë të shkaktuar nga muzika me zë të lartë. Ngjarja ndodhi më 25 janar 2026, rreth orës 02:15, në rrugën Imer Devetaku.
Stacioni Policor në Shtime, nën drejtimin e Policisë së rajonit të Ferizajt, reagoi menjëherë pas sinjalizimeve. Patrullat verifikuan situatën dhe, në bazë të autorizimeve ligjore, shqiptuan tre gjoba kundërvajtëse, secila në vlerë prej 500 euro, sipas Ligjit 03/L-142 për prishje të rendit dhe qetësisë publike.
Lokalet në fjalë, ku zhvillohej aktivitet i lojërave kompjuterike, u mbyllën menjëherë nga pronarët. Lënda do t’i përcillet Inspektoratit të Komunës së Shtimes për procedura të mëtejshme sipas kompetencave ligjore.
Policia thekson se vazhdon të veprojë shpejt për të garantuar rendin dhe qetësinë publike në të gjitha komunat.