Shërbimet e Stacioneve të Policisë Golem dhe Plazh kanë intensifikuar kontrollet në zonat turistike, me qëllim verifikimin e respektimit të normave të ndotjes akustike dhe orareve të përcaktuara për aktivitetet muzikore. Inspektimet u përqendruan në ambientet e identifikuara me risk të lartë për ndotje akustike, si dhe në ato për të cilat qytetarët kishin paraqitur ankesa.
Nëpërmjet përdorimit të pajisjeve matëse, policia konstatoi se dy lokale në Golem transmetonin muzikë mbi nivelet e lejuara nga ligji nr. 9774, datë 12.07.2007 “Për administrimin e zhurmës në mjedis”, i ndryshuar. Për shkak të kësaj shkeljeje, pronarët e lokaleve, shtetasit G. Gj. (46 vjeç) dhe F. S. (30 vjeç), u ndëshkuan secili me masë administrative prej 200 mijë lekësh.
Krahas zhurmës, strukturat policore vijojnë të monitorojnë zbatimin e orarit të lejuar për gjenerimin e muzikës në ambientet e hapura, i cili në zona apo qendra të banuara është i kufizuar nga ora 11:00 deri në orën 24:00. Këto masa janë pjesë e planit të autoriteteve për garantimin e rendit dhe qetësisë publike përgjatë sezonit turistik veror.