Ministri i Brendshëm, Besfort Lamallari, njoftoi se Policia e Shtetit do të intensifikojë kontrollet në të gjithë territorin për evidentimin dhe ndëshkimin e rasteve të ndotjes akustike. Ky operacion ndërmerret në kuadër të masave për sezonin turistik, me qëllim garantimin e qetësisë publike për banorët dhe vizitorët.
Në një reagim publik, ministri Lamallari theksoi se muzika me volum të lartë që cenon qetësinë e komunitetit nuk mund të konsiderohet argëtim. Ai paralajmëroi se çdo shkelës që nuk respekton përcaktimet ligjore do të përballet me masa sanksionuese.
“Policia e Shtetit do të jetë e pranishme me kontrolle të shtuara për të sanksionuar këdo që nuk do t’ia dijë për të tjerët”, deklaroi ministri. Në këtë kuadër, Lamallari u bëri thirrje qytetarëve që të bashkëpunojnë duke raportuar rastet e shqetësimit në numrin e emergjencës 129.