Presidenti amerikan Donald Trump deklaroi se Marina e SHBA-së do të fillojë shumë shpejt të shoqërojë cisternat që kalojnë nëpër Ngushticën e Hormuzit, nëse është e nevojshme. Kjo masë synon të garantojë sigurinë e lundrimit dhe të mbrojë interesat amerikane dhe ndërkombëtare në një nga rrugët kryesore detare për transportin global të naftës.
Në një postim në Truth Social, Trump shkroi se ka urdhëruar Korporatën Amerikane për Financimin e Zhvillimit (DFC) të ofrojë, me kushte të arsyeshme, sigurim ndaj rrezikut politik dhe garanci për sigurinë financiare të tregtisë detare, veçanërisht të energjisë, që kalon përmes Gjirit Persik. Kjo mbështetje është e disponueshme për të gjitha kompanitë e transportit detar.
Ai theksoi se Shtetet e Bashkuara do të garantojnë rrjedhën e lirë të energjisë drejt tregjeve botërore, duke nënvizuar fuqinë ekonomike dhe ushtarake amerikane si më të madhën në botë. "Veprime të tjera do të pasojnë", shtoi ai.
Deklarata vjen pas mbylljes së Ngushticës së Hormuzit nga Irani mbrëmë, rrugë kyçe për transportin e naftës. Irani u zotua se do të sulmojë çdo anije që përpiqet të kalojë përmes saj.
Njoftimi pati efekt të menjëhershëm në tregjet financiare. Çmimet e naftës arritën nivelin më të lartë në 13 muajt e fundit, me naftën Brent që u rrit rreth 8% në kulmin e ditës, por më pas fshiu pjesën më të madhe të rritjes, duke u ngelur me një rritje prej vetëm 2.9% dhe duke qëndruar pak nën 80 dollarë për fuçi para mbylljes së tregut amerikan.
Përditësime
Konflikti SHBA-Izrael-Iran ka ndaluar pothuajse tërësisht trafikun detar në Ngushticën e Hormuzit, përmes së cilës kalojnë rreth 20 milionë fuçi naftë në ditë. Ebrahim Jabbari, këshilltar i komandantit të IRGC-së, deklaroi se Irani do të "vërë flakën" çdo anijeje që përpiqet të kalojë. Ngushtica mbetet e mbyllur.
Komandanti Brad Cooper deklaroi se SHBA ka shkatërruar 17 anije iraniane, përfshirë një nëndetëse, dhe asnjë anije iraniane nuk është më në lëvizje në rajon.
Tregjet globale ranë:
- Kospi -12% (pezullim tregtimi)
- Nikkei 225 -3.9%
- CSI 300 -1.3%
- Nifty 50 -2%
- Dubai -4.7%
- Abu Dhabi -3.5%.
David Solomon i Goldman Sachs paralajmëroi se tregjeve mund t’u duhen disa javë për të përthithur ndikimin.